Visita de Carlos Negro
O CLUB
DE LECTURA DE ALUMNADO tivo un encontro sorprendente co escritor CARLOS NEGRO,
do cal leramos Makinaria e/ou Penúltimas tendencias.
Estas son as
algunhas das opinións a respecto do vivido con el ese día:
Pareceume moi interesante a idea de empregar obxectos,
algúns meteforicamente, para explicar mellor as súas ideas e pensamentos. Ideas
coas que estou de acordo, como o concepto de liberdade física e psicolóxica, feminismo,
modas e estereotipos.
Coido que deu unha clara lección de pensamento e
personalidade propias, mesturadas á súa vez co punto imaxinativo da mente dun
poeta.
Carlos soubo, en todo momento, manter a atención do
alumnado e rematou gañándonos a tod@s ao
repartir chocolate e aconsellarnos sobre como degustalo; sen dúbida.
SMC 3º ESO
O obradoiro con Carlos Negro pareceume interesante;
gustoume moito a súa forma de recitar poemas. Estou moi de acordo cos seus
pensamentos sobre a violencia machista e as opresións ás que están sometidas as
mulleres.
RB 2º ESO
Gustoume bastante; esperábaa máis aburrida, pero tiña
unha boa posta en escena e creo que intentaba ser próximo a nós facéndonos
preguntas e intentando entender o noso punto de vista; tamén me sorprendeu que
non só se centrou nos seus libros, senón que nos falou de poesía en xeral. Quizais
se centrou máis en Penúltimas tendencias
que en Makinaria.
Non creo que a charla sobre Penúltimas tendencias
estivese moi acertada; creo que o do rosa e todo iso non afecta tanto aos
adolescentes porque iso distínguese mellor en nenos e nenas máis cativos onde
os xoguetes se son para "nenas" son rosas e adoitan ser cousas
domésticas como cociñas e bonecas; e figuras de acción, dinosauros e coches
para nenos.
A parte de Makinaria si estivo mellor porque o libro
sérvenos para que teñamos máis coidado, xa que algúns poemas estaban inspirados
en alumnos reais seus, como o título do libro, que era o alcume dun amigo dos
seus alumnos.
HCG 2º ESO
Resultoume interesante, xa que el ten ideas diferentes a
min sobre a poesía. Víase unha persoa seria, pero con sentido do humor.
Notábase que xa o tiña moi ensaiado.
Gustoume que lera algún poema; gústame como os recita.
Tivo que parar de falar algunha vez, pero poucas.
Foi moi divertido; gustaríame que volvese o ano que vén.
Recitounos poemas que non parecían poesía. Falou de dous
libros: Makinaria e Penúltimas tendencias. "Makibaria é
un libro de versos co depósito cheo de gasolina, testosterona e alcol.
Penúltimas tendencias rompe as costuras do silencio: un diario sobre unha
adolescente convulsa e opaca que atopa a voz que nunca tivo".
Despois de falar destes dous libros, fíxonos un agasallo:
un pouquiño de chocolate para todos.
Gustoume moito e espero que volva outro día.
URA 2º ESO
Gustoume moito o obradoiro e o seu libro Makinaria. Pena que non puiden ler o
libro Penúltimas tendencias, xa que
foi do que máis falou e que utilizou
para denunciar a violencia de xénero.
Mágoa que non fose un pouco máis longa. O chocolate negro
que nos deu ao final estaba moi bo.
HDF 2ºESO
O obradoiro con Carlos Negro foi divertido porque non só falaba el senón que deixaba falar aos demais; e non foi aburrido porque dicía moitas cousas. Encantoume que trouxese bonecas e que lese poemas seus e doutros poetas.
NMA 2º ESO
O obradoiro de poesía axudoume a ver as cousas doutra
forma, porque eu non me dei conta do machismo que hai actualmente e estou de
acordo con el, pero tampouco fai falta ser feministas. Eu creo que un termo
medio sería o mellor. Pareceume un obradoiro moi interesante.
JAT 2º ESO
Gustoume porque arrincou dunha maneira moi boa e iso
animoume a interesarme polo obradoiro. Gustoume cando falou sobre Penúltimas tendencias e sacou a boneca e
meteuna na gaiola, xa que representaba moi ben o libro. Logo, falou menos
sobre Makinaria, pero deunos chocolate negro, que non estaba malo.
AAV 2º ESO
Onte, cando veu o escritor Carlos Negro, explicounos como
creou os seus libros, por que os fixo e que quería dicir cos poemas que
escribiu.
O que máis me gustou foi oílo recitar os seus poemas.
Cando leu Makinaria deime conta de
que non todo é festa e de que hai que ser conscientes dos teus actos. Eu non
lin este, pero onte, cando escoitei o que Carlos recitaba, pareceume que o
libro trata dun mozo que morre por ir
drogado conducindo un coche.
Ao rematar as dúas horas leu un poema que lle pediu a
profesora Iolanda e logo comezou a asinar os libros que nós tiñamos del.
En conclusión, pareceume interesante e gustoume que
aceptase vir ao noso instituto.
ACA 2º ESO
O libro gustoume moito e gústame como escribe as súas
formas de pensar. Gustoume coñecelo, non o imaxinaba así; e gustoume que me
asinara o libro porque me gusta ter os libros asinados polos autores.
Había momentos nos que o abradoiro parecía para nenos un
pouco menores ca nós e pasou a maior parte do tempo falando de Penúltimas
tendencias e case non falou de Makinaria; polo resto, gustoume o obradoiro.
IFB 2ºESO
A visita de Carlos Negro pareceume divertida, sobre todo
cando nos leu o libro daquela princesa; tamén foi moi interesante no sentido de
que nos ensinou a ver ese mundo "rosa" no que teñen que vivir as mulleres.
Ao final deunos chocolate negro que tivemos que saborear
mentres nos lía un poema. Ao soar o timbre, Carlos descubriu na entrada do instituto o seu recoñecemento
por pisar o noso centro. Esa foi a miña parte preferida da súa visita.
APA 3º ESO
Comentarios
Publicar un comentario
Grazas por compartir as túas palabras neste sobreiral.